දකුණු ආසියාවේ ප්‍රථම පූර්ණ විදුලි සුපිරි මෝටර් රථය වන ‘Vega’ භාවිතයට අනුමැතිය

‘පූර්ණ වශයෙන් මෙරට දී නිෂ්පාදනය කෙරුණු’ Vega මෝටර් රථයට මෝටර් රථ ප්‍රවාහන දෙපාර්තමේන්තුවේ අනුමැතිය හිමිව තිබෙනවා.

ඒ අනුව, පූර්ණ වශයෙන් මෙරට දී නිෂ්පාදනය කරන ලද මෝටර් රථයක් ලියාපදිංචි කරන ලද ප්‍රථම අවස්ථාව ලෙස මෙය ඉතිහාසගත වනු ඇත.

එහිදී පළමු Vega මෝටර් රථය සඳහා ලියාපදිංචි අංක තහඩුව නිකුත් කිරීම ප්‍රවාහන හා මහාමාර්ග අමාත්‍යවරයා අතින් පසුගියදා සිදුකෙරුණා.

ඔබ නොදත් Vega මෝටර් රථයේ ආරම්භය

Computer software manufacturing සමාගමක් වන CodeGen International සමාගම 2014 වසරේ දී තමයි Vega මෝටර් රථයේ නිෂ්පාදන කටයුතු ආරම්භ කරන්නේ.මෙම සියලු කටයුතු Vega Innovations ආයතනය අයත් CodeGen International සමාගමේ සභාපති සහ ප්‍රධාන විධායක නිලධාරී ආචාර්ය හර්ෂ සුබසිංහ මහතාගේ දැනුම, අධීක්ෂණය සහ නායකත්වය යටතේ සිදුවුණා.

Super car ගණයට වැටෙන Vega මෝටර් රථයේ සියලු කොටස් සහ මෘදුකාංග ශ්‍රී ලංකාව තුළ ම නිර්මාණය කර නිපදවීම විශේෂත්වයකි.

Vega පැයට කිලෝමීටර් 240ක උපරිම වේගයකින් ධාවනය කළ හැකි අතර එක් වරක් බැටරිය ආරෝපණය කිරීමෙන් පසු කිලෝමීටර් 240ක උපරිම දුරක් ධාවනය කිරීමේ හැකියාව පවතින බව එම සමාගම පවසනවා.

මෙම මෝටර් රථයට අමතරව ත්‍රිරෝද රථයක් සහ විද්‍යුත් යතුරු පැදියක් ද CodeGen International සමාගම නිෂ්පාදනය කර තිබෙනවා.

(Source: Ada Derana, Newswire & Vega Innovations official website)