අවුරුද්දට ගමේ යන්න මහජනතාවට විශේෂ ප්‍රවාහන සේවයක්

අලුත් අවුරුද්දට ගම්බිම් බලා යන ජනතාවට විශේෂ දුරගමන් ප්‍රවාහන සේවා මේ වනවිට ආරම්භ කර තිබෙනවා.

සිංහල හා දෙමළ අලුත් අවුරුද්ද උදාවන මේ සතියේදී කොළඹ සහ තදාසන්න නගරවල රැකියාවල නියුතු බොහෝ පිරිස් ගම්බිම් බලා යාමට සූදානමින් සිටිති.

ඔවුන් වෙනුවෙන් මෙවරත් විශේෂ දුරගමන් ප්‍රවාහන සේවා ක්‍රියාත්මකය.

ලංකා ගමනාගමන මණ්ඩලය උත්සවය සමය වෙනුවෙන් බස් රථ 1,400ක් ධාවනයට එක්කිරීමට නියමිතව ඇතැයි වාර්තා වනවා.

එමෙන්ම දුම්රිය දෙපාර්තමේන්තුව සැලසුම් කර ඇත්තේ උත්සවය සමය වෙනුවෙන් ගම්බිම් බලා යන ජනතාවට විශේෂ දුම්රිය 12ක් ධාවනය කිරීමටයි.

හෙට දිනයේ සිට බදුල්ල දක්වා විශේෂ දුම්රියන් දෙකක් අමතර ධාවනයට එක්කර ඇති බවද ශ්‍රී ලංකා දුම්රිය දෙපාර්තමේන්තුව සඳහන් කරනවා.

මේ අතර, බෙලිඅත්ත සිට මරදාන දක්වා සහා ගාල්ල සිට කොළඹ කොටුව දක්වා විශේෂ දුම්රිය 4ක් ධාවනයට එක්කර ඇති අතර, අප්‍රේල් 14 සහ 15 දිනවල පිට පළාත්වල සිට කොළඹ පැමිණීම සඳහාත් අමතර දුම්රිය එක්කර තිබෙනවා.

අප්‍රේල් 13න් පසුව කොළඹ එන ජනතාවට අවශ්‍යතාවය අනුව බස්රථ යෙදවීමට පියවර ගෙන ඇති බවද ශ්‍රී ලංකා ගමනා ගමන මණ්ඩලය පවසනවා.